話說有人今朝返返吓工，突然靈機一觸，「叮」一聲咁諗到，除咗微笑之類嘅臉部表情之外，其實我仲可以透過身體語言，例如係揮手、點頭等等，喺向人打招呼嘅時候釋出善意、表現得比較熱情，無咁西口西面。
於是，我一見到腦細推門入公司，雖然應該都係做緊嘢唔記得咗笑，但我都反射性地用嗰把被提醒咗好多次「講嘢大聲啲」嘅蚊滋聲講咗句：「你好。」咁我都驚腦細會聽唔到㗎嘛，所以等佢行近我嘅時候，我又好突兀咁講多句：「午安。」幸好我都記得擠出笑容外加大力點頭。
無諗過擺明是心情唔差的腦細，竟然會笑住同我講：「今日樣樣都好咗喎！」
到夠鐘收工，我亦終於醒水去敲腦細房門，當然唔少得係掛返個笑容喺面，再換把比較有朝氣嘅聲線先開口講：「唔好意思，如果無嘢要我幫手嘅話，咁我而加收工喇，再見！」
「你今日開心咗好多喎！」腦細又話。見氣氛咁好，平時肯定唔會再搭嘴嘅我都專登笑咗出聲，打趣話，係呀哈哈，希望返工越嚟越開心啦！唔該晒你哋呀！
其實唔係嘅，我依然係抱住同前幾日一樣嘅心情返工。我唔係唔開心，但亦確實未搵到有令我長時間都保持笑容嘅元素，畢竟我平日都唔係成日會笑㗎嘛，尤其係一個人嘅時候，我通常都係木無表情，做返自己居多。只係既然有人開到聲，講出我嘅不足之處，咁我當然會認真對待，希望可以儘快改進啦。始終搵工真係好難，難得有人肯俾機會我去做嘢，就緊係要加倍珍惜。更何況不論係上司定同事，每個人都對我好好，返工放工會幫我拉住度門，腦細甚至會主動幫我將個背囊揹上背脊，又真係好坦承，喺盡力幫我處理粗重工夫之餘亦會對我有要求，一直鞭策我去進步，令向來自我形象低落嘅我，可以見證住自己漸漸改變，體會到「有能力做啲正常人做到嘅事」嘅喜悅，從中搵到生存嘅動力同意義。所以我真係好着緊呢份工，唔希望因為自己做得唔好而被解僱。老實講，返工真係辛苦㗎，好多時會忙到連飯都唔得閒食。不過，工作帶俾我嘅益處同成就感，偏偏可以令我心甘情願唔出街玩唔上網唔篤電話又唔覆WhatsApp ，仲堅持每朝都早啲起身準備定，執吓不嬲都不修邊幅嘅外貌，順便食個返學嗰陣實嫌麻煩唔肯食嘅早餐，儲定能量應付工作。每日我都覺得好攰，而且腰酸背痛，日子卻係前所未有地充實，原來用咁嘅形式生活都幾快樂。
不過俾腦細讚完之後，我而加就真係好開心喇。❤️
#爭啲就罰自己抄返工時不准西口西面一千次
#繼續努力去笑多啲先得
Search